اسئلة واجوبة للبابا عن الادمان

:flo ذكرت قداستكم في كتاب روحانية الصوم إنه لابد من وجود فترة انقطع عن الصوم
ولكن تتملكنى عادة شرب الشاى صباحا فأنا متعود على شرب ما يزيد عن أربعة أكواب شاى يوميا لدرجة أنا بنفق 20 % من مرتبى على شرب الشاى فقط و لقد حاولت كثيرا التخلص من هذه العاده ولكننى لم أستطــع فماذا أفعل ؟

شوف كل حاجة تسيطر عليك وتفقدك حريتك مفروض تبطلها مهما كانت حلال يعنى بولس الرسول بيقول كل الأشياء تحل لى ولكن لا يتسلط على منها شىء ما تخليش حاجة تتسلط عليك مش الغلط في شرب الشاى الغلطة إنك فقدت إرادتك وأصبحت مش قادر تسيب الشاى وأصبح الشاى بالنسبة لك زى السيجارة للى بيدخن إيه الفرق ! كمان لاتنسى شىء الشاى ممكن يزود ضغط الدم والقهوة ممكن تزود ضغط الدم إذا كان تناولها بكثرة بل أيضا الكاكاو ممكن يزود ضغط الدم كمية الكافيين الموجودة في الشاي في القهوة في الكاكاو ممكن تزود ضغط الدم يعنى تضرك صحيا أيضا ،وضغط الدم بيأثر على الدم وعلى القلب وخلى الشاى ينفعك بقى .
فإنت لما تمتنع عن الشاى تعرف تصوم من جهة تقوى إرادتك من جهة ، تصلح صحتك من جهة أخرى ،توضب ماليتك إللى 20% منهم رايحين على الشاى يعنى الشاى دلوقتى بقى زى واحد من ولادك في الصرف عليه ولا زى مراتك يمكن مراتك ما بتاخدش 20% صحيح !!
إزاى تبطل ؟ ممكن تحاول إنك تخلى شىء بديل تشربه مرة تشرب شاى مرة تشرب قرفة مرة تشرب عصير مرة تشرب من الاعشاب البرية دى ـ هما يسموها برضه شاى لكن هى أعشاب برية – وصحيا كويسة ,ما تشربش خالص . لازم توري إن ليك إرادة قوية وإنك تعرف تبطل . طب هتعمل إيه في أسبوع الآلام هيبقى أسبوع ألام بالشاى ؟! إزاى دا يعنى! لازم تبطل إضغط على نفسك إن ما قدرتش قلل النسبة بدال ما تشرب 4 كبايات الصبح إشرب كباية واحدة بعد كده فصلك كباية أو فنجان تكون صغيرة كده واقنع نفسك أنك أخدت كباية وهي صغيرة تطلع 4/1كباية ولو تاخدلك شفطة من نفسك وتسيب الباقى
تقول أدينى نفذت وشربت وتسيب الباقي . يعن تقلل الكمية وتقلل عدد المرات وما تشربش الكباية كلها . في ناس بتوع سجاير بيعملوا كده وأنا شوفت أطباء كده ,ياخد نفس ويحط السيجارة جنبه وأهى ماشية وهو بيكتب ، بيعمل ، بيشتغل وسايبها في حالها وكل شوية يفتقدها بنفس أو بنفسين وموجودة !! تحاول إنك إنت تمتنع أو تقلل عدد المرات أو تخلى الكوب صغير أو ماتشربهوش كله وشوية بشوية تنتصر، أو تستبدله بحاجة تانى وشوية بشوية ربنا يساعدك من شرب الشاى .
حاجة تانى : نصيحة نسيت اقولها لك ماتشربش شاى تقيل ، الشاى التقيل هو اللي بيعمل الكيف .في ناس كانوا في الجبل يقولك شاى عربى يبقى شاى أسود , أسود بجد وهو ده اللي يكيفه ... شاى أسود فأنت ابتعد عن الشاى الاسود وخلى الشاى خفيف . يعنى ما يبقاش تقيل إن كنت بتحط فيه ورقة بتاعة شاى ماتخليهاش تقعد مدة طويلة أهو تلونه وترميها وما تقعدش تعصر فيها على الاخر وتاخد كل حقق, خليه خفيف . ابتعد عن الشاى المغلى . ابتعد عن الشاى التقيل، لان دا يضرك 000
أرجو أن تعرفنى هل التدخين خطية أم شبه خطية ؟

دى خطية وخطية وخطية على الاقل 3 خطايا فى قلب بعض, خطية الإساءة إلى صحتك وخطية إنك تحرق فلوسك بالنار وهى أموال أسرتك وممكن تنفق في الخير والخطية التالتة إن إرادتك ضعيفة مش عارفة تقاوم فدول 3 خطايا مش خطية واحدة
بيقول ماذا افعل وانا لست قادرا عن الاقلاع عن التدخين؟
لاإضغط على نفسك وهتلاقي تقدر ؟هو تتعب لك يوم ولا يومين وبعدين تاخد على كدا,يوم أو يومين وإذا تعبت خدلك ملبساية , شغل بقك على الفاضى والمليان بأى طريقة كدا,تنفخ في الهوا، يعنى تعمل أى حاجة 0 ومجرد إنك تقول أنا مش قادر أهى دى خطية , ليه إنت ما تبقاش قادر ؟! لماذا يأتيك هذا الضعف والعجز؟! وهل تكون على صورة الله ومثاله وانت مش قادر؟! دا الرسول بيقول كل الأشياء تحل لى ولكن لا يتسلط على منها شىء, يعنى إن لقيت بيتسلط عليك فنجان الشاى بطل الشاى علشان لا يتسلط عليك, مش علشان حرام وحلال علشان مافيش حاجة تتسلط عليك وارجعله بعدين لكن ما تخليهوش يبقى عادة , وانا مش فاهم إيه المفيد في التدخين دا000مش عارف؟! يعنى يستفيدوا منه إيه ؟! دا أول واحد دخن في العالم كان راجل من الأثرياء وخد دخان بينفخه, العبد بتاعه ـ كان أيامها فيه رقيق ـ إفتكر إن سيده شاط فراح جاب جردل ميه ودلقه فوقيه علشان يطفيه من جوه 000



واحد بيقول هل السجاير حرام ؟ وهل السجاير تمنع من دخول الملكوت ؟
وبعدين بيقول هل جربت قداستكم السجاير ؟
شوف يا ابنى انا ما اطيقش ريحة السجاير0يعنى لو حد قاعد جنبى وشرب سجاير اشعر كما لو كان بيحصلى إختناق من ريحة السجاير0ووصلت حساسيتى للسجاير إلي درجة صعبة 0إن لو دخلت أودة وكان فيه حد بيشرب فيها سجاير أقول هنا في الحتة دي كان فيه حد بيشرب سجاير 0وبقت أصعب من كده إن لو خرجت مثلا إلى مكان مكشوف 0إفرض خرجت من المقر ومشيت في الهوا اقدر أقف عند حته وأقول هنا كان فيه واحد بيشرب سجاير دى من جهتى 0
هل السجاير حرام 0خدها كمبدأ ليك فى حياتك كل شىء يضرك أو يضر غيرك هو حرام 0أقولها تانى : كل شىء يضرك أو يضر غيرك يبقى حرام ,السجاير بتضيع صحتك وبتضيع فلوسك وبتضيع إرادتك 0ضد المال ضد الارادة 0بل قالوا إن بعض السرطانات بتأتى نتيجة التدخين 0ودلوقتى الصحة العالمية بتعمل دايما إعلان التدخين مضر بالصحة لدرجة إن ساعات ييجى إعلان عن نوع السجاير في مجلة من المجلات ياخد صفحة بحالها ، شوفوا صفحة الغلاف بحالها عن السجاير يكون دافع فيها كام ألف وتحت إعلان السجاير (التدخين مضر بالصحة – هيئة الصحة العالمية) 0
ووصل الأمر بأن فيه أماكن يحرم فيها شرب السجاير 0 دلوقت بدأت في البلاد الكبرى الطائرات الداخلية –يعنى مش من قطر لقطر او من محيط لمحيط او من دولة لدولة – من ولاية إلى ولاية بيمنعوا فيها التدخين 0
حاجة تاني اللي بيشرب سجاير بيضر اللي جنبه وبيضر اللي حواليه لأن وهو بينفخ الدخان الدخان دا بيستنشقه اللي جنبه واللى حواليه فكأنه مش بس بينضر لما هو بيشرب سجاير دا بيضر اللي حواليه أيضا 0 وطبعا اللى حواليك يبقى حرام 0
إلى جوار أن السجاير بتضيع الإرادة بتاعتك يعنى فيه عادة مسيطرة عليك إنت مش قادر تخرج منها 0 دا فيه ناس ما بيقدروش يصوموا بسبب السجاير 0مادام فيه حاجة مسيطرة عليك وإنت مش إنسان حر بالمعنى الكامل يبقى دى حرام 0 حتى بالنسبة للأشياء اللي حلال إذا سيطرت عليك يبقى حرام لذلك فيه أية بتقول كل الاشياء تحل لى ولكن لا يتسلط على منها شىء 0 يعنى ما تخليش شىء يتسلط على إرادتك 0
حاول إذا كنت بتشرب سجاير إنك تبطل شرب السجاير 0 جايز تتعب شوية لكن ها تستريح بعدين 0جايز تتعب شوية لأنك مولف وعايز تشرب 0لكن بعدين ها تستريح وصحتك هاتبقى كويسة000

ماذا تنصح الشباب الذين يدخنون فى حوش الكنيسة؟

: لابد أن يؤخذ الحزم معاهم , إلا بقى لو كانوا لقوا الكاهن بيدخن هما بيدخنوا زيه ,على رأى المثل إذا كان رب البيت بالدف ضارب فشيمت أهل البيت كلهم الرقص , فما يصحش أبدا, الكتاب بيقول ببيتك تليق القداسة يارب فاللي بيدخن في حوش الكنيسة بيرتكب 3 خطايا على الأقل ,خطية شرب السجاير وخطية عدم إحترام الأماكن المقدسة وخطية إعثار الآخرين .على الأقل ال3 خطايا دول ,بيعثر غيره بيوقعه فى إدانة وبيوقعه في شك وحاجات كتيرة جدا.
والسجاير خطية لعدة أسباب :
أولا : لأنها تتلف صحتك, تضيع صحتك أول حاجة.
تانى حاجة تضيع أموالك .
تالت حاجة تضيع الإرادة بتاعتك , لأن الشخص إللي بيشرب سجاير مستعبد لعادة ,إرادته ضايعة مش قادر يتحكم فيها .تضيع صحته, تضيع أمواله ، تضيع إرادته .فما يصحش إن الواحد يشرب سجاير .
س : هيا فيها أيه ؟
ج : فيه كتير يعنى كفايه الايه اللي بتقول كل الأشياء تحل لى ولكن لا يتسلط على منها شىء يعنى أى شىءبيتسلط عليك ويفقدك حريتك كإبن لله يبقى خطية ,لأن مفروض إنك أنت لا يتسلط عليك شىء , حتى إذا لقيت شرب الشاى بيتسلط عليك سيب الشاى شويه ,إشرب قرفه, إشرب كاكاو , إشرب جنزابيل ينفع في البرد وعايز ترجعله تانى ارجع ولكن ما تخليهوش يسيطر عليك, كسيطره مش حرام لكن السيطره مش كويسة ,دا فيه ناس إن ما شربوش كباية شاى ما يعرفش يشتغل بقية اليوم يبقى الصيام الانقطاعي بالنسبة له راحة...
أنا شماس فى كنيسة ما حاربتنى عادة التدخين ولم أعترف بها لأبى الكاهن
وقد حرمتني من ذهابى للكنيسة ومن التناول بالمرة وحرمتنى من الخدمة
في الكنيسة ولم أستطع أن أمتنع عنها . أرجوك يا سيدنا ترد على هذا السؤال ؟
إوعي تفتكر إن إنت لو ما اعترفتش الأب الكاهن مش ها يعرف , دا مجرد يقعد معاك ويشم ريحة بقك يعرف إنك إنت بتدخن ,مجرد تفتح بقك ويشوف سنانك مصفرة شوية أو شفايفك فيهم أثر الدخان ها يعرف إنك بتدخن,مجرد يبص في صوابعك إللي بتمسك بيهم السجارة هيعرف إنك بتدخن فما تفتكرش إن خطية التدخين خطية ممكن الواحد يخبيها ,باينه في سنانه وباينه في شفتيه وباينه في صوابعه وباينه في ريحته رائحته رائحة تدخين .
أنا من رأيى لازم يكون عندك ضبط نفس ,لازم تضغط على نفسك ولازم تشوف السجاير عملت فيك إيه.بتقول حرمتك من الكنيسة ، حرمتك من التناول , حرمتك من الخدمة بل باين انها حرمتك من الاعتراف أيضا . فهل السيجارة تستحق كل دا؟! السحارة أتلفت حياتك الروحية أتلفت إرادتك وبتتلف صحتك وبتضيع فلوسك . فهل تستحق كل الحاجات دى ؟! لازم تضغط على نفسك تقول هابطل يعنى ابطل تعبت دوخت جرى لك إللي جرى لك قول لازم أبطل , لو ضغطت على نفسك كام يوم هتلاقي نفسك بطلت , أنا أعرف إنسان كان كبير في السن قللى أمكنه إنه يبطل السجاير بعد 30 سنة في التدخين يعنى بقت تجرى في دمه . حاول تبطل واضغط على نفسك إن ما قدرتش مرة واحدة خليها بالتدريج اللي يقل بالتدريج مش اللي يقل ويرجع زى ما كان , وما تشربش غير بقى فى العزيز القوى اللى ما قدرتش خالص ... مش معناها إن أنا بسمحلك بدى ,أنا بس باعترف إنك فى هذه الحالة بتبقى ضعيف ...إضغط على نفسك
وبطل ...

أنا شاب فى الثامنه والعشرين من عمرى تسيطر على عادة التدخين لدرجة لا توصف حاولت التخلص منها ولم أقدر , فما هو الحل ؟
طيب يا ابنى دا انت تضيع نفسك بصحيح , أنا دايما بقول للناس اللى بيدخنوا... بيشربوا سجاير يعنى ... بقول له السجاير بتضيع صحتك وبتضيع فلوسك وبتضيع إرادتك.لدرجة دلوقتى مؤسسة الصحة العالمية بتكتب إن التدخين ضار بالصحة حتى في الاعلانات اللي بيعملوها عن التدخين .يعنى تلاقي شركة سجاير بتعمل إعلان صفحة كاملة من مجلة من المجلات ربما دافعه فيها كام ألف وتحتيها في الإعلان بتاع السجاير ده التدخين مضر بالصحة , يعنى في الإعلان اللى عايزين الناس يشربوا فيه سجاير بيكتبوا فيه السجاير هتضركم ,فانت بتضيع صحتك وبتضيع فلوسك وبتضيع إرادتك
تقوللى ما أنا عارف بس أبطلها إزاى ؟ إن ما قدرتش قلل وتدرج في التقليل لغاية لما تبطل , أه إستعمل حاجة تملى بيها بقك بدال السجاير، مصمصلك ملبساية , أى حاجة يعنى , كل ما يجيلك رغبة إنك تشرب سجاره تشرب فنجان قهوة , تشربلك حاجة تانى , عاند مع نفسك عاند ولو تتعب قول هتعب هتعب واللى يحصل يحصل صلى أن ربنا يديلك قوة
الاخ دا اللي باعت السؤال دا درس للباقيين اللي جايز يبتدوا في السجاير وما يعرفوش يبطلوها .
أنا شخصيا ما أطيقش ريحة السجاير , وعندى حساسية كبيرة ضدها لدرجة لو دخلت في أودة فاضية أقول هنا كان واحد بيشرب سجاره. أو لو مشيت فى السكة في هواء طلق أقف في حته وأقول هنا كان فيه واحد بيشرب سجاره . المهم وأنا شاب صغير كان لى صداقة مع أحد أساتذتى وكان يحبنى جدا ولازم كل أسبوع أفوت عليه, ففي مرة عزم على بسجاير فقلت له ما أقدرش أعد يلح قلتله أنا عارف إن كل واحد بيشرب سجاير بيتمنى إنه يسيبها فازاي واحد يبتدى وكل اللي بيشربوا سجاير يتمنوا أن يسيبوها ، فقاللى طب بلاش , بعديها بأسبوع ولا أسبوعين عزم على بسجاير , اقوله إيه دا ؟! دا أستاذى قلت له أنا أعرف إن كل واحد بيشرب سجاير بيدعى على اللي علمه سجاير أول مرة ...قاللى ربنا ينجينى من دعاك وما بقاش يعملها تانى .
أنا رجل أبلغ من العمر 48 سنة وأدخن من فترة طويلة لكن وجدت إن التدخين يعوقنى روحيا , فبإرشاد قداستكم كيف أقلع عن التدخين ؟

مادام قلت إنك أنت راجل تبلغ من العمر ... فخليك راجل وتسيب التدخين يعنى تعزم عزيمة إنك ما تدخنش مهما قامت الدنيا ولا قعدت ,تلاقى نفسك دوخت مش عارف إيه ... ما فيش تدخين , تلاقى جات لك مشكلة ... ما فيش تدخين ,يعنى عايزة عزيمة صادقة قوية.
التدخين مش بس يعوقك روحيا , التدخين بيهدك جسديا , تصور الدخان اللى بيخش جواك والرئه بتاعتك بتبقى سوده وتعبانه م الصماد اللى فوقيها ,الدخان اللى فوقيها وناس كتير بيجيلها سرطان الرئه واللى بيجيلهم أنواع أخرى من السرطان , والدخان اللىبتدخنه ده فيه النيكوتين وفيه أول أكسيد الكربون وفيه القطران وفيه مواد كتيرة جدا مهلكه للجسد وأنواع كتيره من السرطانات بتيجى من الدخان بجوار تعب الجهاز التنفسى ,أنا أعرف واحد كان سباح ماهر كان يغطس في البحر يقعدله دقيقة تحت الميه على بال مايطلع وبعدين بعد ما بقى يدخن ما بقاش يقدر ما بقاش يقدر يعوم واللى كان يجري ما بقاش يقدر يجرى .
حاجة تانى عايز أقولهالك التدخين لا يضرك فقط وإنما يضر الذين حواليك لأنه برضه الدخان اللى بتطلعه من بقك دا بيشموه اللى حواليك ,فبيضرهم فإنت بتضر اللى حواليك . علشان كده فيه كتير من الطيارات مكتوب عليها ممنوع التدخين وخصوصا الطيران اللى داخل البلاد , فيه طيارات ما فيش فيها تدخين وفيه طيارات اللي المسافات طويلة خالص بيسمحوا بحته كدا معينه يدخنوا فيها , لكن بيضر .
دا هناك ضرر أخر من التدخين ضرر الزوجة والأولاد اللى في البيت ما هو بيشموا الدخان اللى إنت بتطلعوا من بقك ,بل أكثر من هذا الضرر الجنين في بطن أمه لأن الزوجة زوجها بينفخ الدخان في وشها وهى تتنفسه غصب عنها ويخش جوه يتعب الجنين جوه ,ويبقى الجنين جايز يطلع صحته تعبانه ...يطلع مشوه ,يجرى له أى حاجة بسبب التدخين فانت مادام عرفت التدخين مضر كدا ما تدخنش وخليك شديد وجامد ومهما حصلك ...لا دوخة ...ولا تجربه ولا غيره ما تقولش أرجع للدخان ,والتبطيل ربنا يساعدك عليه . دا فيه واحد قال للتانى دا تبطيل السجاير دا سهل جدا أنا بطلتها 10 مرات قبل كده ...
هل شرب البيرة حرام زى شرب الخمور ؟

وإنت عايز تشرب بيره ليه .أنا عاوز أعرف ؟! كتير من الناس اللى بيشربوا خمور على الآخر إبتدوا بالبيرة .إفتكروا حكاية البيرة مش خطية كبيرة ...ووصل فانت ابتعد عن أول حاجة علشان ما توصلش لأصعب حاجة ,مالك إنت بالبيرة يابنى إيه اللى دخلك في الحاجة دى ؟!
قاللى أب إعترافى عندما سألته عن شرب النبيز : قاللى إنه مقوى وليس مسكر , فهو ليس خطأ . فهل هذا صحيح أم خطأ ؟ فإن كان خطأ وفعلت ذلك كما قاللي أب اعترافى
فهل تحسب على خطية أم لا ؟

مش صح إن أب اعترافك يقولك الكلام دا . نحن في المسيحية لا ننجس المادة ولا نحرم المادة ,ومع ذلك لا نسمح بإن إنسان يشرب الخمر إلا لو كانت هناك أسباب ضرورية صحية تدعوا إلى ذلك , لكن كدا سماح كدا بلا سبب ,طب يا بنى إفرض إن انت شربت النبيت ولقيته لا يشبعك وعايز حاجة أتقل منه شوية, ممكن يكون النبيت يكون الخطوة الأولى لأفظع أنواع الخمور. والمسيحية بتمنع الخطوة الأولى . ليس لأنها تحرم المادة , نحن لا نحرم المادة ولكن سوء استغلاها هو الذي نحرمه ...



لماذا عمل السيد المسيح معجزة تحويل الماء لخمر , مع إن الخمر بتفسد العقل والروح ؟
فى الحقيقة هناك فرق كبير بين الخمر المسكر ,علشان كده قيل عن يوحنا المعمدان خمرا ومسكرا لا يشرب .فيه فرق . الخمر اللى كان المسيح بيسمح بيها هي عصير العنب اللى بمجرد عصير العنب بالتخمير تكون نسبة الكحول اللى فيه .فيه فرق . الخمر اللى كان المسيح بيسمح بيها هي عصير العنب اللى بمجرد عصير العنب بالتخمير تكون نسبة الكحول اللى فيه 4%, 5% ودى نسبة لا تؤذى إطلاقا .
أما الخمر اللى بطريقة التقطير وبتصل إلى 50% ولا 60% كحول فهذا الكحول الزائد هو اللي بيفسد العقل والروح , طبعا الخمر اللى سمح بيها السيد المسيح في عرس قانا الجليل لم تكن مسكرا وكانت مجرد خمرا بالتخمير بفعل المعجزة ولم يكن فيها كمية من الكحول تفسد الجسم....

تحريم شرب الخمر في الإنجيل ؟
لأ. الكتاب المقدس لا يحرم الخمر كمادة . كمادة غير محرمة لأنها لو حرمت كمادة كنا لا نستخدمها فى الأسرار المقدسة حتى ولو نقطة . لكن إسمها مادة نفس المادة , فهي غير محرمة كمادة .
هي أيضا محللة كعلاج وليس كمزاج بدليل إن بولس قال لتلميذه تيموثاوس خذ قليل من الخمر لأجل معدتك وأسقامك الكثيرة , طبعا طبعا دلوقتى فيه طرق علاج كتيره غير الخمر لكن زمان كانت تستخدم . حتى فى الجروح , السامرى الصالح صب خمرا وزيتا , الخمر بما فيه من كحول ممكن يكوى الجروح ، والزيت ممكن إن هو يعمل له كده زى عشاء يمنع عنه حاجات كتيره , وكمان الزيت كان بيطرى الجروح والقروح والحاجات دى. فكان الزيت والخمر بيستخدموا فى العلاجات , طبعا دلوقتى الأدوية ارتقت وتطورت وانتشرت فمش محتاجين لخمر لكن دا يدل على إن الخمر كمادة غير محرمة.
كمان انتوا بتتكلموا على مصر , لكن فيه بلاد غير مصر , فيه بلاد باردة جدا وأحيانا يحتاجوا لشىء من الدفىء ولا يمكن الخمر بيديلهم أزيد من الاحتياج , وفيه ناس ساعات بيبقوا في شيخوخه وجسمهم ليس فيه حرارة طبيعية يعنى تعبانين جدا وممكن ياخدوا قليل من الخمر للتدفئة لكن اللي بيحصل في البلاد الحارة والجسم حار طبيعى لما بياخد حرارة زيادة من الخمر بتأذيه وتتعبه جسديا وليها أضرار.
كمان الخمر لابد أن نفرق في أنواع الخمر , الكتاب المقدس فرق ما بين الخمر والمسكر , بيقول على يوحنا خمرا ومسكرا لا يشرب يعنى زى الاباركه اللى بياخدوها فى الكنيسه فيها يمكن ما يطلعش 4% منها كحول , وفيه أنواع من الخمرفيها 60% يعنى حاجة تتلف . عموما نحن لا نوافق على الخمر كمزاج وكعادة يستعبد لها الإنسان وكمسكر لأن الكتاب بيقول الخمر مستهزئة والمسكر عجاج والمترنح بها ليس بحكيم , فحاجات كتير بتمنعها , لكن هى ليست محرمه كعلاج ولا كمادة ...


هل الشاب المصري يقدر أن يتغلب على الإدمان؟
ممكن .وفيه مركز لعلاج الإدمان ولتأهيل الإنسان ,وأسقفية الخدمات بتعمل مركز لمعالجة الإدمان اسمه "الحياة الأفضل"في الأول بيتعالج الإنسان علاج صحى علشان يخرجوا من جسمه السموم اللى رسبت فيه ديا
وبعدين بيعملولوا تأهيل بإنه يبعد عن الجو اللى هو فيه .واحنا عندنا مركز تأهيل في وادي النطرون بيقعدوا فيه حوالى سنة يتمرنوا على إنهم يعيشوا بعيدا عن الادمان ...


ما معنى الإدمان ؟ وما مسبباته ؟ وهل الكافيين فى القهوة يسبب الإدمان ؟
طبعا الإدمان من حاجات كتيرة , فيه حاجات خطيرة زي الحشيش والأفيون والكودايين والهيروين والماريجوانا , دي الحاجات اللي بتسبب الإدمان وأخطرهم هي الهيروين دا اللي مجرد شمه واحده الواحد ياخدها ما يقدرش بعد كده يبطلها وفيه نس بيضيعوا الآخرين بهذا الوضع .
جايز فيه نوع تانى من الإدمان يخش في القهوة والشاى , على فكرة الكافيين مش بس فى القهوة الكافيين في القهوة وفي الشاي وفى الكاكاو وفي الشيكولاته طبعا لأن فيها الكاكاو وأيضا في مركبات الكولا يعنى موجود في البيبسى كولا وموجود في الكوكاكولا وموجود في هذه المركبات كلها فيها كافيين بس الكافيين بتختلف نسبته من مادة لأخرى , والناس بيقولوا إن الشخص يصل إلى الإدمان إذا كان مثلا من جهة القهوة يشرب فى اليوم خمسة فناجين أو أكثر وما يقدرش يبطل , يعنى فنجان واحد , إتنين أهى مرت لكن أزيد من خمسة فناجين يبقى تتعبه من ناحية زيادة نسبة الكافيين وأيضا لو لقى نفسه مش قادر يبطل يبقى دخل في الإدمان , الإدمان يعنى مش قادر يبطل , الكافيين طبعا مادة منشطة وبتشعر الإنسان بالنشاط والبعد عن الملل وبتدى نشاط للجهاز العصبى بتاعه , علشان كده الناس بيحبوا يشربوا القهوة والشاى لكن إذا ذادت تضر القلب ولذلك ممنوع على مرضى القلب إنهم يشربوا قهوة أو شاى , وبترفع ضغط الدم وبتمدد الأوعية الدموية , ولو زادت خالص ممكن تجيب جلطة , فكل شىء بالاعتدال كويس , يعنى شربتلك فنجان قهوة مافيهاش حاجة ,فنجانين ماجراش حاجة , زجاجة كوكاكولا مافيش حاجة لكن تقعد تدمن يعنى كثرة مع عدم القدرة على ضبط النفس , ليها متاعب صحية كتيرة.
والكافيين إذا ذاد تزيد نسبة الدهنيات فى الدم أيضا ويخلى ضربات القلب تزيد , في الناس اللى بيكتروا شرب الكافيين يقولوا تأتى حالة أحيانا يسموها التسمم بالكافيين , علشان كده الكافيين موجود في القهوة كتير وإسمها أخذ منه coffee
يعنى جاى منها الاسم لكن مش معناها ان تاخد الاسم منه يبقى بس موجود في القهوة , موجود في كل الحاجات دى , فواحد يقول لا أنا مش كييف ما بشربش قهوة ولا شاى ويكون قاعد ياكل شكولاته بنسبة كبيرة , صحيح نسبة الكافيين فى الكاكاو مش كتيرة لكن الكترة في الكمية القليلة تكون كمية كبيرة .
فيه إدمان المسكنات , يعنى فيه ناس يدمنون نوعا من المسكنات والمهدئات يتحول إلى إدمان وعلشان كده فى البلاد التى تحرص على صحة أولادها مش ممكن يصرف دواء بأمر الطبيب حتى الإسبرين ما يبصرفهوش إلا بأمر من الطبيب لان زيادة الإسبرين بكثرة تزيد السيولة فى الدم ودى مش كويسة , ما هو في ناس بينتحروا بإنهم ياخدوا إسبرين كتير . كل حاجة تكون بإرشاد تبقى كويسة ...

wer: